Кніга кастрычніка
Новыя гаджэты, Інтэрнэт, сацыяльныя сеткі
– сучасныя падлеткі паглынуты віртуальным светам… І тым не менш, аб чыстым светлым каханні марыць кожная юная лэдзі, ды і юнакі паступова пачынаюць прымяраць на сябе статус кіраўніка сям’і. Дык чаму б не прапанаваць ім прачытаць займальную кнігу, якая, напэўна, не пакіне абыякавым юнага чытача.
Бутэвіч, А. І. Расстайны пах асоту : аповесць і апавяданні / Анатоль Бутэвіч. – Мінск : Беларуская Энцыклапедыя імя Петруся Броўкі, 2021. – 135 с. – (Кніжная паліца школьніка).
Аб кнізе
Аўтар: Анатоль Бутэвіч
Жанр: аповесць і апавяданні
Выдавецтва: Беларуская Энцыклапедыя імя Петруся Броўкі
Год выдання: 2021
Серыя: Кніжная паліца школьніка
Рэкамендацыйны ўзрост: 16+
Аб аўтары
Выдатна сказаў знакаміты рускі паэт Мікалай Някрасаў: «Паэтам можаш ты не быць, але грамадзянінам быць абавязаны!» Хоць, думаецца, яшчэ лепш, калі гэтыя дзве якасці ў творчым чалавеку спалучаны. Як, напрыклад, у Анатоля Бутэвіча. Ён не толькі празаік, перакладчык, публіцыст, крытык, але і беларускі дзяржаўны дзеяч, дыпламат. У свой час працаваў мiнiстрам культуры i друку. Працуе ў сферы дзіцячай літаратуры, гістарычнай, публіцыстыкі, крытыкі, у галіне перакладу. Друкавацца пачаў у 1969 годзе. У творчым багажы лiтаратара — дзясяткi кнiг.
Аб чым кніга?
Кніга беларускага пісьменніка Анатоля Бутэвіча ўключае творы, прысвечаныя каханню – гэтаму загадкаваму і магічнаму пачуццю, часам неспасцігальнаму, як і сам сэнс жыцця. Распавядаючы пра першую закаханасць падлеткаў, пра ўзаемаадносіны ў школе і ў час адпачынку, першы танец, першы пацалунак, першае ліставанне, аўтар уздымае складаныя пытанні, якія застаюцца важнымі для чалавека на ўсё жыццё.
Кніга прызначана для вучняў старэйшых класаў, а таксама для ўсіх, хто цікавіцца сучаснай беларускай прозай.
Змест:
Інстынкт, або Прысак кахання і жарства пакут (аповесць у пісьмах) |
Знаёмства ля сіняга мора (апавяданне) |
Ойча наш (апавяданне) |
Сланечнікава закаханасць (апавяданне) |
У кожнага свае баяры, або Спатканне з котлішчам майго маленства (апавяданне) |
Я буду помніць цябе (апавяданне) |
Я чую музыку (апавяданне) |